Xuquuqda codbixinta ee doorashada baarlamaanka

Waxaad xaq u leedahay inaad ka codbixiso doorashada baarlamaanka haddii aad:

• gaartay 18 sano ugu dambayn maalinta doorashada,
• tahay muwaadin Iswiidhish ah, iyo
• aad ku diiwaangashan tahay ama hore ugu diiwaangashanayd diiwaanka dadweynaha ee Iswiidhan.

Xuquuqda codbixinta ee doorashada gobolka iyo degmada

Waxaad xaq u leedahay inaad ka codbixiso doorashada gobolka iyo degmada haddii aad:

gaartay 18 sano ugu dambayn maalinta doorashada,
tahay muwaadin Iswiidhish ah oo ku diiwaangashan degmada ama gobolka, ama
tahay muwaadin ka tirsan waddan ka mid ah Midowga Yurub, ama Iceland ama Norway, oo ku diiwaangashan degmada iyo gobolka, ama
tahay muwaadin waddan kale ah, ama qof aan lahayn dhalasho, oo aad ugu yaraan saddex sano oo xiriir ah ka hor maalinta doorashada ku diiwaangashanayd Iswiidhan, isla markaana aad ku diiwaangashan tahay degmada ama gobolka.

Shuruudahan xuquuqda codbixintu waxay khuseeyaan adiga ku nool Iswiidhan, laakiin sidoo kale waxay khuseeyaan adiga dibadda ku nool wax ka yar hal sano oo weli ku diiwaangashan Iswiidhan. Tani waxay tusaale ahaan noqon kartaa haddii aad dibadda wax ku barato ama ka shaqeyso.

Xuquuqda codbixinta ee adiga ah Iswiidhish dibadda ku nool

Waxaa laguu tixgeliyaa Iswiidhish dibadda ku nool haddii aad tahay muwaadin Iswiidhish ah, aad mar uun ku diiwaangashanayd Iswiidhan, oo aad ka guurtay Iswiidhan. Waxaad xaq u leedahay inaad ka codbixiso doorashada baarlamaanka, si codkaagana loogu tiriyo doorashada waa inaad ku jirtaa liiska codbixiyeyaasha.

Xuquuqda codbixinta si otomaatig ah ayaad u haysanaysaa muddo toban sano ah ka dib markaad ka guurto Iswiidhan. Intaas ka dib, adiga ayaa iska diiwaangelinaya muddo cusub oo toban sano ah. Waa inaad mar uun ku diiwaangashanayd Iswiidhan si aad isu diiwaangeliso liiska codbixiyeyaasha oo aad u hesho xuquuqda codbixinta.

Qorshahaaga codbixinta

Haddii aadan xaq u lahayn inaad ka codbixiso doorashada baarlamaanka, doorashada gobolka ama doorashada degmada, weli waad samaysan kartaa qorshe codbixineed — gaar ahaan si aad uga caawiso asxaabtaada iyo dadka aad taqaan inay codeeyaan.

Doorashadu waa 13-ka Sebtembar